KAK-p nittartagaq ilinniartitsisarfiusussaq timersoqatigiiffiit sungiusaasuinut ikiuutissaasoq atuutilersippaa.

Atortorissaarutit ilinniartitsinermi atorneqartussat ajornaquteqanngitsumik atorneqarsinnaanissaat anguniarlugu piffissami sivisunerusumi teknikikkut suliaqartoqareersorlu maanna nittartagaq atorlugu KAK ilinniartitsisarnissaminut piareerpoq.

Kalaallit Nunaanni interneteqarnerup pitsanngoriartuaarnera ilutigalugu nittartagaq atorlugu futsalimik pikkorissaasinnaanerit periarfissaalerput. Maannalu nunatsinni internetimik sukkanerusumik atuisinnaalerneq nalaarluarneqarpoq. Taamaalilluni nuna tamakkerluni ajornaatsumik pilertortumillu anguneqarsinnaanngorpoq.

Sungiusaasoq KAK-p nittartagaani ilinniarnermigut teoriinik, videonik allanillu misissuataarisinnaanngorpoq, aammalu nammineq sukkassutsini qaqugulu piffissaqarnini malillugit ilisimasaqaleriartorsinnaanngorluni.

KAK-p periusissiaa – Ilinniartitsinerup piginnaassuseqarneq pitsanngortissavaa

Sungiusaasunik ilinniagaqarsimasunik timersuutip nuannarineqaqisup ineriartortinneqarneranut pingaaruteqartunik amerliartortitsinnissap ilungersorluni sulissutigineqarnissaa KAK-p periusissatut pilersaarutaanut ilaavoq.

“Ukiuunerani piffissami sivisuumi tamaviaarussilluinnartunillu timersortartoqarfiusumi nuna tamaat, kisianni aamma timersoqatigiiffiit, eqqarsaatigalugit KAK-p futsali ineriartorluarfiusinnaasutut isigaa. Meeqqat sungiusaasuinit inersimasut sungiusaasuinut pikkorissartitsissaagut siunissamilu nunanut allanut sungiusaasuujumaartussanik maannamiit ineriartortitsileriissalluta.” KAK-p siulersuisuini siulittaasuusoq Finn Meinel oqarpoq.

Suliaqarneq – nittartagaq atorlugu pikkorissarnerit

https://www.edukak.gl-imi atuisutut iseruit futsalimi sungiusaasutut pikkorissarfissat akeqanngitsut PowerPointinik, videonik aammalu teoriinik futsalimik ilinniartitsinermi tunngavissanik nassuiaataasunik imallit iserfigisinnaavatit.

Maanna https://www.edukak.gl-imi atuisutut nalunaarsinnaalereerputit!